الدبة والحجر قتلوا صاحبهم ومصر بخير
مشاهد التعذيب غير الصحيحة هي التي تم عرضها علي الناس في البيت بيتك والمشاهد الحقيقية مع إنها متاحة للكل علي النت
بس برده الدبة مصممة المرة ديه علي قتل صاحبها

 شاهد بنفسك

http://www.alanbaaalalamia.com/watch.htm

أنا مواطن من الدرجة التالتة , أحتسب ذلك مما أراه حولي ,ذلك إن إحتسبوني فرداً في هذا الوطن والمجتمع هذ المجتمع الفاقد لهويته ومرجعيته الإجتماعية وسيطرة اللا أخلاقية عليه وسادة لغة المصالح هي الغالب عليه ومن بين تللك العوامل التي تفقد المجتمع وأفراده البقية الباقية من عقله المفكر هي تلك الدبة اللعينة التي دائماً ما تقتل صاحبها ومحركها بهدف إنقاذه من ذلك الذباب الذي يضايق صاحبها ويقرفه في عيشته ومش مخليه ياخد راحته خالص معلش يا دبة إحنا دبان ولاد دبان إللي زعلنا صاحبك نعمل ايه بقاه قدرك إنك تحاولي قتلنا بحجر كبير أو بعدة أحجار تجي كلها في وش صاحبك وتتركه ينزف وهو في أوج عظمته وهيمنته دون أن يحس إنك تقتلينه وبرده إحنا هنفضل زي ماحنا دبان ولاد دبان نقرف صاحبك في عيشته وإللي جاي بعده وبعده إلي أن تموتي أنت بلا رجعة ويأتي مكانك كائن ما عادل يفكر لايقتل صاحبه ولا يقتل الدبان بل يحتوي كل من الأخر ويلبي طلبات الدبان وصاحبه .

أنا دبانة حقيرة (مذكر) من دبان البلد ده شاف بعينه حاجات كتيرة وسمع أكتر بكتير وشاف ما لا عين رأت غير متصفحي الإنترنت , كل الحاجت إللي شافها خلته يحمد ربنا ويبوس إيده وش وضهر علي إنه لم يدخل قسم البوليس في أي حاجة قبل كده غير لما راح يعمل بطاقة الإنتخاب ويسأل علي حج القرعة من علي باب القسم , المهم نسيبنا من موضوع القسم ده ونخش علي الموضوع إللي مربوط بالأقسام برده ,إظاهر إنو مفيش فايدة , بيقولوا قال ايه دبان قذر مجرم تم تعذيبه داخل الغرف المغلقة بالأقسام التابعة لوزارة الداخلية ,اه والله وأنا شفت نسبة كبيرة من الأفلام ديه علي النت وعلي قد خبرتي البسيطة من كتر القعدة علي النت ومشاهدة الأفلام وتصنيعها علي النت سواي عن طريق الفلاش أو غيره ,هذه الأفلام صحيحة بنسبة 90% والعشرة الباقية الله أعلم ليه لان  في إعترافات من الدبان المتعذب بتقول الكلام ده حصل وبعدين التمثيل لو كانت مفيش حد يقدر ياخد من ضابط ممثل يجي خمسين قلم علي وشه محققاً ذلك الضابط الرقم القياسي في عدد الأقلام علي الوش في الدقيقة يعني اتلضابط ده عمل ريكورد في الضرب علي الوش وشفت تاني كمية قفايات علي القفه ايه روعه من إللي قلبك يحبها وكلها كانت علي مجموعة من المجرمين الله يحرقهم , ده غير البت إللي بتعبط لمدة 9 ثواني ومؤاخراً القاتلة المعترفة بجريمتها وهي وهيه متعلقة من إيدها ورجلها فوق كرسيين خشب وطبعاً علي رأس كل هؤلاء الضابط صاحب العصاية المشهورة إللي دخلها في مؤخرة عماد الكبير , كل هذه المشاهد حقيقية تم تصويرها داخل أماكن مغلقة يتم فيها التعذيب بشكل دوري علي مواطني الدرجة التالتة إللي محسوبين كده إنهم مواطنيين أساساً .

كل إللي فات ده مش مشكلة بس المشكلة الحقيقية إننا نقول إن كل ديه مشاهد تم تصويرها من قبل الحاقدين من الدبان والنموس المتربص بأمن الوطن ونظامه , عند كتابة هذه الجملة وجدت نفسي خلف الورقة وأنظر لنفسي بنظرة استنكار دعتني للسخرية والضحك معلش بس هما إللي قتالوا كده مش أنا , وبعدين إزاي يقولوا متخصصين هما إللي صوره المشاهد ديه والوزارة تقول إنها قامت بإحالة الضابط صاحب العصاية المشهورة للتحقيق كما إنها تبحث عن الفتاة المعلقة من يديها وتصرح إنها أيضا تحقق مع الضباط أصحاب وقائع القفايات والأقلام وإحالتهم إلي التحقيق .

دعونا ننظر إلي الجزء الفارغ من الكوب يوجد أكثر من 15 شريط مصور يوضح التعذيب يا تري كم عملية تعذيب تمت من ما تتصور كام باشا ضرب كام حيوان ابن كلب وما مدي تأثير هذا الضرب علي علي هذا الحيوان هل تم تحويله إلي مواطن صالح أم تم تحويله إلي حيوان مفترس يكره كل من حوله وبالأخص البوليس , يعني مثلاً يكون زي فريد شوقي في فيلم سلطان لما يشوف الزراير الميري يتجنن ويطيح ضرب وقتل في الناس ممكن ده يحصل مع عماد الكبير لما يشوف عصاية في إيد عسكري المرور مثلاً ولا مع الواد إللي بينضرب علي قفاه لما يشوف حد لابس بوليس وبيرفع إيده مثلاً .

الداخلية مشكورة لم تكذب عدم حدوث مثل هذه الحوادث ولكنها أكدت إنها ليست السياسة العامة للوزارة وإن لكل قاعدة شواذ بس لازم نعترف برده إن الشواذ كتروا أوي اليومين دول مش نقول تهديد سلامة الوطن وندفن راسنا في الحيط ,لكن ممكن السيطرة عليهم من خلال إعادة الثقة فينا نحن مواطني الدرجة التالتة تجاه رجال الشرطة , يعني لما أشوف بعيني أمين شرطة في البلدية بيجري قدامه يجي عشرين بياع سريح وبضاعتهم وهوه عمال يقولهم ياولاد الوسخة …. يا ولاد الكلاب ….في وسط الشارع مفيش أي مشكلة ماهوه ماشي بيرتع في تكية إللي خلفوه أكيد هاحقد عليه وعلي كل من هو منهم لأن السيئة تعم فما بالك بكثرة السيئات مع العلم إن واحداً من أعز أصدقائي أمين شرطة وهنا يكمن اللغز أمين الشرطة والضابط ده ممكن يكون صاحبي … أخويا … إبن عمي …. جاري … بس لما تكون أخطاء الغير وخاصة عندما تكون أخطاء فاضحة وتمس كرامة الإنسان أين ما كانت جريمته فالمتهم برئ حتي تثبت إدانته مش يتعذب علشان تثبت إدانته كما مع البنت المتعلقة فكل هذه الأفعال توسع الفجوة بيننا نحن أبناء الطبقة التالتة وبين البشوات بتوع الداخلية .

نرجع للدبة إللي خانقاني من سنين إللي مش عارف أعمل معاها إيه بعد أن سقط عنها القناع وظهر لنا الوجه القبيح الذي يراه الجميع دون أن تراه هي , أنا زهقت أكتب بالرمز يعني هيحصل إيه أكتر من كده إللي مش عارف مين هيه الدبة يقفل أحسن ولا أقولك أستني شوية أنا مضطر أعترف علشان الدبة مش شايفة نفسها يبقي أنا إللي هاخليها تشوف الدبة ديه هو الجهاز العريق العتيق الأنتيك المسمي بالتلفزيون المصري وطبعاً صاحبها هنا هو كل ما يمس الحكومة والنظام إللي هيموت علي إيدها من غير مقاطعة إذا ما إستمر في نهجه الحالي التغيير لا يكون في الشكل فقط يا أستاذ تامر التغيير يجب أن يكون في المضمون , طبعا لازم نشيد بالأحجار غير الكريمة اللئيمة شديدة السواد وهي شلة الفاسدين المنتفعيين بأي شكل من الأشكال من وراء ذلك ولكنها أيضا ستكون سبباً في قتل صاحبها عاجلاً أم أجلاً .

أن تقوم الدبة والحجارة بتكذيب قول وفعل صاحبها دي حاجة عربية خالص بس ده يبقي أنت أكيد أكيد في مصر وممكن يحصل أي حاجة طول ماأنت في مصر ولسه الدبة والحجارة موجودة في أماكنها ديه أول مرة حد يقول فيه خلل تيجي الدبة تقول لا من خلال أحجارها وتقول مصر بخير مفيهاش خلل ولا حاجة ويبعد عنها الشر والأشرار إللي عايزين جنازة ويشبعوا فيها لطم ويا سلام علي الحجارة لما تتكلم كلامها كله في مقتل والدبة عمالة تحدف الحجارة علشان الدبان يموت بس الدبان مش بيموت الدبان بيقوي أكتر وأكتر ومش ممكن حد ميعرفش شعبة الدبان إللي عملتلها الدبة أكبر دعاية في إنتخابات مجلس الشعب وكانت النتيجة كما هو متوقع ستقتل الدبة صاحبها وينجح الدبان في الوصول إلي البرلمان عن طريق الدعاية العكسية وحالات الحوار الأونطة والحجر الكبير إللي كل ما يعمل حلقة من برنامجه ضد الدبان تزيد شعبية الدبان والناس تتقربلها أكتر وأكتر .

ملحوظة : المشاهد التي عرضها برنامج البيت بيتك حول التعذيب هي مشاهد تم تصويرها محاكاة لما يحدث في الأقسام أما مشاهد التعذيب الحقيقية التي لم ولن يعرضها هي التي تحقق فيها وزارة الداخلية عيب التضليل وإحنا في بداية شكل ومنهج جديد في التليفزيون كما تقولون .ولا عايزين تقتلوا صاحبكم كما فعلتم سابقاً ومازلتم تفعلون ناوين تودونا علي فين أكتر من كده .

عبدالحميد سعيد