أنا كان مالي ومال المشي في الشارع

كتبهاعبود ، في 21 مايو 2007 الساعة: 13:59 م

أنا كان مالي ومال المشي في الشارع

أعود دائماً من العمل ليلاً وخلال سيري في الشوارع الخالية ينتابني شعور إنها ملكي وحدي لا أحد يشاركني فيها حيث أفضل أن أسير علي قدمي إلي المواصلة الثانية متفادياً الأولي لأسباب كانت ومازالت في بعض الأوقات مادية ثم أصبحت عادة أحبها وبثمن المواصلة الأولي أشتري لب لأوسخ به شوارع القاهرة المتسخة مسبقاً فلست الوحيد الذي يلقي بكل ما في يده علي الأرض إنها عادة أحاول أن أنتهي عنها لكن نعمل إيه لما الفلوس تجري في إيد الواحد ويبقي معاه خمسين قرش زيادة لازم يفرجها علي نفسه ويبحبحها ويجيب بيها حاجة واهو الواحد مش عارف هتبقي معاه بكرة و لا ,,,,, ما علينا الواحد الحياة وخداه اليومين دول ومش عارف هوه عايز إيه بالضبط ,عايز يعيش طب منين ,عايز يخرج مع أصحابه برده منين ,عايز هدوم منين, لازم يشتغل علشان يلغي كلمة منين من قاموسه ومنين ديه مش البتاع اللي بيتا كل… منين تعني من أين لك بهذا وعلي فكرة أنا مش المدعي العام علشان أسأل السؤال ده ولا أنا مأمور ضرايب دانا يسأله لنفسي والله مش لحد تاني من البشوات اللي انتو عارفينهم طبعاً .

الشغل هيوفر الحاجات ديه " طبعا لا "أمال إيه أهو بدل ما الواحد يتقال عليه عاطل الشغل أحسن حتى لو لسه أبويا ببديني فلوس بس في أخر الشهر مش في أوله زى طول عمري اللي فات يمكن دلوقتي قلت بس لسه ببديني إلي أن أصبحت مدمن الفلوس بتاعت أبويا فلوس لها معني كبير عندي هذا بالإضافة إلي الانفراجة التي تحدثها علي تعاملاتي مع الآخرين من زملائي وأصحابي فأنا معي فلوس أخر الشهر ….هما لا…. وهي الحياة إيه غير مساعدة وتكافل من الآخرين " الوالدين "

الحياة كلها كده أصحاب كتير لسه مشتغلوش لما بنقعد مع بعض بيحسوا إني بقيت حاجة كبيرة أوي أصلي أنا دايما بكون حاجة كبيرة في عيون أصحابي مش عارف هل ده علشان أنا مليان شوية …. شويتين ولا علشان مناقشاتي المستمرة معهم التي تعطينا دافع نحو الحياة أحسن ما نموت وإحنا حتى مبنفكرش أنا مش بعمل حاجة في حياتي غير أني بفكر وبقول رأي في كل حاجة أعرفها وبرده يمكن أكون حاجة كبيرة عندهم يعني حاجة كده لما تيجي بتوجع لهم دماغهم… يمكن… جلنا سقراط العصر أبو دماغ كبيرة كل حاجة فيه كبيرة .

كل اللي فات ده كانت مقدمة جت علي بالي قلت أكتبها يمكن حد تعجبه ويقرأها يقول الأخ هيكتب عن نفسه حاجات تكسف ولا هيتكلم بشفافية زى معودنا فيما سبق لكن أخي لا تظن بى الظنون الحكاية كلها أنني حبيت أكتب عن شي غير معتاد ملوش دعوة بالهم والغم اللي الواحد صابح ممسي بيه كمان بس مش عارف هقدر ولا لا فالمشاكل تحوطني من كل جانب وأنا أترك كل هذه المشاكل وأقعد أكتب حاجة مش عارف كام واحد هيقراها وكام واحد هتعجبوا كام واحد هيشتمني وكام وكام وكام ……. المهم لازم أكتب لازم أقول حاجة حتى لو مفهمتش أنا عايز أقول إيه أهو يبقي قولت وخلاص هيه يعني جت علي كلمتي مكل الناس بتتكلم ومحدش عارف الناس عايزة إيه ولا حد عايز يعرف الناس مالها .

الناس كلمة كل ما أقولها أقف كتير عندها مش عارف ليه بس الناس هتتجنن من اللي بيحصل حواليها , بيان عاجل سيتم تحويل القاهرة الكبرى إلي عباسية كبري نظراً لملئ العباسية الصغرى الناس ماشية بتكلم نفسها في الشوارع لو أنت مثلاً أيوه أنت يا اللي بتقرأ , لو مشيت في الشارع وبصيت علي الناس وهيه ماشية هتشوف العجب واللي أعجب منه علي الأقل سبعة من كل عشرة مشين بيتكلموا مع نفسهم في الشارع والتلاتة الباقيين ممكن يكونوا بيتكلموا مع نفسهم برده لكن من غير محد يلاحظ ده يعني ممكن تشوفني ماشي بتكلم مع نفسي في الشارع عادي إيه اللي فيها ديه واحد بيفرج عن نفسه بس أنا عارف نفسي أنا من التلاتة يعني بحاول علي قدر الإمكان أن أخفي حديثي مع نفسي علشان اللي حواليا في الشارع ليفتكروا حاجة كده ولا كده برده الواحد بيعمل حساب بكرة يجي حد يقول ده اللي انتوا شايفينوه قدامكم ده آنا شفتوا بيكلم نفسه من كام سنة في الشارع يا عم الحاج يعني أنا الوحيد اللي بيكلم نفسه يرد علي ويقول برده هوه كل الناس بقت كده يعني علشان آنت اللي تتكلم بالنيابة عنهم وينتهي الحديث كما هو معتاد بالخناقة التمام وكل واحد يقول للتاني انته مش عارف انته بتكلم مين أنا هارابيك يا ابن ….. طبعا ده مش أنا , أنا متربي وابن ناس ومش بقول الألفاظ ديه أنا أخري التهكم عليه لو كان بيفهم بس أتضح إنه بيفهم وفهم قصدي من وراء التهكم لذلك قام بالشتيمة موضحاً معرفته وعلاقته بكبار الشخصيات البوليسية في الأقسام وعلاقاته الجامدة جداً بأمناء شرطة بعض الأقسام اللي هيربوني ويخلوني امشي علي العجين مالخبطوش…… شوف البني أدمين كل واحد عرف حد لابس بدلة داخلية يبقي خلاص مع إني لابس بدلة داخلية من قطعتين قطن مصري طبيعي من محلات ….. للأقطان ,محدش أحسن من حد البدلة بتاعتي غالية برده بس ديه محدش بيشوفها.

نرجع للبيان تاني ذلك البيان كان مقرراً له الظهور إلي العلن منذ فترة لكنه أنتظر المنفذ الفعلي البطل الذي يخرج علينا ليعلن قيام دولة العباسية الكبرى في ميادين القاهرة ذلك البطل الذي طال انتظاره منذ أمد ولم يظهر , فنحن الناس الأغلبية منا يتحدث مع نفسه في وضح الطريق ومش عامل أي قيمة لأي حد تاني بيوشوش نفسه في الشارع وبعدين ما كل الناس والمراكز الحقوقية والإنسانية هريانا بيانات تنديد لا إحنا مش بتوع تهديد إحنا اللي اتكلمنا في الشارع مع نفسنا ومش همننا حد, في حد عمل كده إحنا كتير جداً نحن الأغلبية الحقيقية في تلك البلد لقد جمعتنا الأقدار جميعا داخل نسيج متفاعل مع الآخرين من خلال الكلام مع أنفسنا فقد ضقنا زرعاً وسيطرة علينا رغبة الحديث العلني وإعطاء أنفسنا حق الاستماع بوضوح فنكاد أن نصيب بالصم للحوار الهامس يبننا وبين أنفسنا يعني الواحد هيطّرش من كتر ماهوه بيوشوش نفسه ومش سامع هوه بيقول إيه .

أنا شفت كنت مع تلاتة أصحابي طبعاً مش هقول أسمائهم علشان الشهرة ملكي وحدي أنا فأنا وحدوي فهذه الكلمة أعجبتني كثيراً حين رأيتها علي يفت أحد الأحزاب المصري وقد استقرت لدي بهذا المعني أي أنا ومن ورايا الآخرين أنا في المقدمة لذلك كنا أربعة أنا وخلفي ثلاثة أخريين ,يطئبت أحدهم ذراعي لكني أسبقه بخطوة ,عند كلية طب أسنان القاهرة نتمشي من الجامعة إلي شارع القصر العيني حيث محل الكشري الذي إعتدنا أن نأكل عنده فقابلنا ذلك البطل رمز الحركة القومية لدولة العباسية الكبرى يسير عكس سيرنا ثم يشير إلي أحدنا بيديه ويتحدث لم نفهمه لكنه ظل يتحدث متغاضياً عما نفعله من ضحك ذو ضجيج إلي أن أنتبه أحدنا ثم قال له أنا انته بتكلمي أنا ثم وقف أمامه توقعت ما سيحدث لصديقي هذا بس هوه اللي جابه لنفسه فأنتبه الرجل لصديقي فأنزل يده بعنف وأدخلها إلي جيب البنطلون الذي يرتديه وابتعدنا جميعاً عن صديقي الذي هرب من تلقا نفسه من أمام الرجل الذي ما إن وضع يديه في جيبه نظر إلي الأرض وهرول مسرعاً بعيداً عنا فقد قطعنا عنه حديث شيق مع نفسه .

يوم أخر كنت أسير مع نفس الثلاثة حيث إننا لم نكن نفارق بعضنا خلال دراستنا الجامعية سوي في المظاهرات حيث أنني كنت أحب مشاهدتها وليس المشاركة فيها, كنت بتفرج بس والله العظيم , فبعد أن تم ضرب كلية الآداب والحقوق والتجارة وكل الكليات اللي بطل علي الشارع في جامعة القاهرة بالقنابل المسيلة للدموع وهي أيضا مسيلة للكحة والأنف يعني انته واقف مش عارف توقف إيه بالضبط دموعك ولا كحتك ولا مناخيرك يارب متكونش بتسيل حاجة تانية كنت عايز أروح مستور من غير أي تغيرات علي البنطلون سواء من الأمام أو الخلف الحمد لله لم تكن مسيلة لأشياء أخر المهم كنت أنا وأيمن بنتفرج علي المظاهرات شفتوا أنا مش وحدوي أنا كتبت اسم أيمن أزاي مش علشان حاجة بس علشان تعرفوا إن أنا مكنتش لوحدي كان معايا مساعدين كتيير ومحمد ومحمد وعلي وسيد وأحمد كلنا كنا بنتفرج .

بعد ضرب الكلية بالقنابل حلفوا إن اليوم اللي تكون فيه مظاهرات لهما مروحيين بيوتهم , اليوم ده كان في مظاهرة جوه الجامعة مكنتش كبيرة أوي فحودنا شوفناها كده علي السريع وبعدين قلنا نروح نضرب كشري وإحنا عند المظاهرة شفت واحد كان ماشي جنب المظاهرة واخذ يتحدث إلي نفسه كلامه كان واضح "تقدر تقولي هما هيغيروا حاجة ومتقولش أهو موقف ياما مواقف خدناها ومفيش حاجة حصلت خد انته رايح فين" ثم لاحظ وجودنا واستماعنا له فأطلق هو الأخر ساقيه للرياح !!!!!!!!!

لي صديق شيخ جامع وطبعا مش هقول اسمه لعدة أسباب أولها فاكرين الوحدوية لسه تأثيرها كبير عليا وتاني الأسباب انو ممكن يروح في داهية لو قلت اسمه ليفتكروه من الجماعة المحظورة ونروح أنا وهوه في خبر كان ويطلع "تامر أمين" في البيت بيتك ويشمت فينا والأخ مش بيراعي الزمالة ولا حاجة …..ما علينا الشيخ سعد قالي الحكاية ديه , طبعاً مش اسمه سعد بس أنا سميته بكده محاولة مني للتخلص من الوحدوية,وبرده تمويه علشان محدش يعرف اسمه الحقيقي, وفي يوم بعد العصر جت ست للشيخ……. شفت كنت هاكتب اسمه لكن ربنا ستر خليها سعد, الست بتقوله إن جوزها طردها من البيت ومش عارفة تعمل إيه فجت للشيخ سعد علشان يحاول يرجعها , دون مقدمات سعي الشيخ في الخير وذهب إلي الرجل الذي يعرفه فهو من أهل المنطقة .

بمجرد أن فتح الباب وشاهد الرجل زوجته والشيخ صرخ وقال ملكش دعوة أنت يا شيخ سعد أنت راجل كويس وخليك كويس علي طول .

معلش يا ابني بس أنت قول هيه زعلتك في إيه وأنا أخليها تبوس رأسك

لا رأسي لا متعور فيها

معلش هطيّب خاطرك زى ما أنت عايز

الولية اللي معندهاش دم بتشغل الراديو

………

طبعاً أنت واقف عن أي تفكير معلش ده كان موقف الشيخ سعد وموقفي حينما قال لي وكذلك حال من عرف بالموضوع حالة من التوقف عن كل شي بتروح مع الوقت …… خلاص راحت نكمل لحسن كده الشيخ سعد خد كتير أوي من الكلام لكن الكلام اللي بجد واللي يهمنا هو ذلك المناضل البطل الرمز الذي أسقط كل الحجب عنه وتحدث مع ربنا مرة واحدة كده فعلي حين غرة وبعد أن أقنعه الشيخ سعد بدخول زوجته إلي البيت قام البطل بالتوجه إلي سقف الصالة وقال بصوت عالي يرضيك أنت كده هيه تغلط والشيخ سعد يجي يدخلها البيت في تلك اللحظة هم الشيخ في الخروج من هذا البيت خوفاً علي نفسه وما ان توجه إلي باب الشقة وجد من ينادي عليه يا شيخ سعد…. تصبب عرقاً والتفت خلفه فوجد المرأة تحدثه بصوت هادي معلش يا شيخ سعد أصله بقاله يوميين مش بياخد الدوا بتاعه …. سكوت ثم نزول من علي السلم مع قول الله يكون في عونك .

إن الأبطال والرموز كثر لا أحد يحصيهم لكن موقف مثل هذا الموقف يذكرني بموقف أخينا المناضل المنسي عن ذاكرتنا اللي اسمه ……. مش عايز أعمل تفرقة , المهم هو من أكبر المناضلين في عصرنا هذا وكان حلمه أن يتحدث إليه الله وكان كل يوم ليلاً يصعد علي سطوح عمارته ويظل يتحدث مع الله ويقول يا رب كلمني يا رب كلمني وفي أحد الأيام كان له جار قد فشل في الحديث إلي الله وقبل بأن يحدث هو الله فقام وهو علي باب شقته وقال بصوت عالي يا ……. نفس عدد النقط علشان التفرقة , فرد عليه ……. نعم يا رب لقد استجبت لي أخير نعم يا رب نعم . انزل يا ابن الوسخة نام .

إيه ده إيه الدوشة ديه الناس ديه كلها ملها ملمومة عليا كده ليه هما كلهم بيبصوا عليا كده ليه أنا فين إنا إيه اللي جابني هنا طبعاً حطيت إيديا في جيبي وأطلقت ساقي للرياح وأوقفت تاكسي وركبته مسرعاً وخلال ركوبي للتاكسي سمعت بعض الجمل من الناس , يا خسارة علي الشباب , لا حول الله , معقول إحنا ممكن نكون كده ,الحياة بتعمل في الناس أكتر من كده ,الدنيا يا ما فيها , يا عين أمك يا اخويا , بس والله واد ظريف , يا عم ده تلقيه مهيس ولا حاجة ,بس البتاعة الأخيرة ديه جامدة جداً .

لو كنت عايز تضحك من قلبك إقرائها تاني وبعدين حاول تفتكر هتلاقي نقسك بتضحك وأفتكر وأنت بتضحك انو يكون من قلبك علشان الحياة تدوم ….سلام

الواد محمد عايز جزمه والبت مني عايزة جيبه يا تري هجيب ده كله منين ….. سائق التاكسي .

واحد كان ماشي في الشارع

عبد الحميد سعيد

أضف الى مفضلتك